Lyrics 

samudita-madane ramaṇī-vadane cumbana-valitādhare |
mṛga-mada-tilakaṃ likhati sapulakaṃ mṛgam iva rajanī-kare ||1||

ramate yamunā-pulina-vane vijayī murāriradhunā ||dhruvapadaṃ||||

ghana-caya-rucire racayati cikure taralita-taruṇānane |
kurubaka-kusumaṃ capalā suṣamaṃ rati-pati-mṛga-kānane ||2||

ghaṭayati sughane kuca-yuga-gagaṇe mṛga-mada-ruci-rūṣite |
maṇi-saram amalaṃ tāraka-paṭalaṃ nakha-pada-śaśi-bhūṣite ||3||

jita-bisa-śakale mṛdu-bhuja-yugale kara-tala-nalinī-dale |
marakata-valayaṃ madhu-kara-nicayaṃ vitarati hima-śītale ||4||

rati-gṛha-jaghane vipulāpaghane manasija-kanakāsane |
maṇi-maya-rasanaṃ toraṇa-hasanaṃ vikirati kṛta-vāsane||5||

caraṇa-kisalaye kamalā-nilaye nakha-maṇi-gaṇa-pūjite |
bahir-apavaraṇaṃ yāvaka-bharaṇaṃ janayati hṛdiyojite ||6||

ramayati subhṛśaṃ kām api sudṛśaṃ khala-hala-dhara-sodare |
kim aphalam avaśaṃ ciram iha virasaṃ vada sakhi viṭapodare ||7||

iha rasa-bhaṇane kṛta-hari-guṇane madhu-ripu-pada-sevake |
kali-yuga-racitaṃ na vasatu duritaṃ kavi-nṛpa-jayadevake ||8||